Si Keong Mangalo Si Landuk Maradu Ipas Marlojong
Di sada ari di tonga ni harangan. Manjappal bulung ni rupput mada sada Keong.
Inda sadia leleng tarida iama madabu sada manggis. Ikojar ia mada manggis napayak di topi ni lokko-lokko i.
Pasma giot sampe ia, hapengani baya ro ma sada Landuk manyargut manggis i. Lepe mada si Keong i.
“He Landuk. Au puna dei. Au do parjolo mangida manggis namadabu i..” ning si Keong tu si Landuk
“Inda boto-boto au i. Pokokna huida, usargut. Aupe malean do au,” ning si Landuk.
“Ulang layas roamu tu au da Landuk. Maloja au makkojar manggis namadabu on. Saroa-roamu manyargutna,” ning si Keong muse.
“Oih… nakkon pola bahat caritomu. Aso lambat parlojongmu…. Rassoi,” ning si Landuk muse.
“Ooo… mur marlayasko ateh. Takko ita coba jolo maradu ipas marlojong,” ning si Keong dohot suara nagogo.
Ibege si Gaja dohot si Goppul mada partokkaran on. Tarsonggot halai mambege si Keong mangalo si Landuk maradu cepat marlojong.
Itopotkon halai madah si Keong rap si Landuk. Baru isapai halai si Keong sanga sikapeto do nagiot maradu ipas marlojong on.
“Olo. Bia langa ? Tottuhon hamuma idia dohot andigan hami nagiot maradu ipas marlojong on,” ning si Keong
Sidung i, mulak mada si Keong tu halaian. Dohot dicaritohon ia tu dongan-dongan nia nagiot maradu ipas marlojong ia dohot si Landuk i.
“Narittik do ho. Polama taralo ho i. Memang naso adong madah paretongan di ho,” ning dongan-dongan niai tu sia.
“Denggan do dabo. Nakkon pola dokkon au narittik. Ra do hamu manolong au ? I do dabo,” nin si Keong on tu dongan-dongan nia i.
“Bia carana ?” nikkalai tu sia
“Ooo… satiop dua pulu meter di dalan parlojongan nami i, akkon adong monjap sada Keong di potpot i. Pas ro si Landuk, kaluarma hamu sian potpot i tu tonga ni dalan i, aso tarsonggot si Landuk,” ning si Keong.
“Bo…. tardapot attong namangicu hita,” ning si Keong adaboru natobang nai.
“Inda tardapot i. Harana sarupo do bolangmu dohot bolangku. Naisangka nia dei au ho. Parlojongnia kan naipasan, inda na ipareso-reso ia i sanga au sanga ho,” ning si Keong.
Opat ari sian i, dapot mada ari nagiot maradu ipas marlojong i. Si Gaja dohot si Goppul madung ibaen halai garisna, sian dia sampe tudia nagiot marlojong i.
Sada… dua… toluuu… ning si Goppul. Si Gaja pe diombuskon ia ma igung nia nagijang i. Tarbegema sora nagogo.
Langsung mancicing si Landuk namarlojong i. Si Keong pe disitutui ia ma namarlojong i. Hape baya manadaoan si Landuk, anggo si Keong hum nalewat saotik dope sian garis i.
Peto mattong baya naidokkon ni si Keong i. Mahipasma ilala si Landuk namarlojong i, hapengani pupu diida ia si Keong di jolo nia. Lojjah… noma iraso ia namarlojong i.
Sian nadao, tarida si Landuk mada si Gaja rap si Goppul di topi ni garis i, mamiomio si Keong na giot sampe tu garis i.
Ipaipas si Landuk parlojong nia. Inda tarida ia adong batu di dalan i. Targoppang mada ia, sampe manyarat doma isang-isang nia tu dalan i lopus sampe tu garis an.
Ipabolnang ia matania. Isangka ia mamonang ia namarlojong i. Hapengani na madung di jolo nia do si Keong martata-tata.
“Asi bisa songoni ?” ning si Landuk
“Bo… ima. Maidaho sanga ise naipas na,” ning si Keong
Nasadia honok, dilehen si Goppul mada di si Keong hadiah ni namaradu ipas marlojong i.
Disima ipaboa si Keong tu sude naadong disi, bahaso nangge sada ia namarlojong i. Naitolong dongan-dongan nia do ia.
“Hami baenpe songonon, aso iboto ho mada Landuk, kalah do pistar tu bisuk. Ulangbe beteng ilalaho. Onpe sodarma ho da dongan,” ning si Keong.
“Olo dongan. Napeto mada naidokkon mon. Sala ma au disi. Inda hu ulaki bei. Moofkon au dongan. Songoni juo tu hamu sasude naadong dison. Mangido moof au. Inda huulaki be parange napatikkal-tikkalkon i,” ning si Landuk.
Onpe salosema carito on dongan. Sian on dapot hitama sipaingot;
Sada: Ulang marlayas sanga tuise sajo.
Dua: Kala do pistar ibaen bisuk
Tolu: Mola adong parsoalan nagodang, pokatkon tu dongan-dongan
Keterangan
Landuk = Kancil
Goppul = Beruang
Keong = Keong
Gaja = Gajah
