- Hata ni Suhut (Mora Naro)
Assalamu ‘alaikum Wr, Wb
Santabi sampulu, sampulu noli marsantabi, maradopkon natobang natoras diloloan on, sumurung lobi di ompui sian bagas godang. Songon i, maraud koum sisolkot sasudena. Songon I mada bere bope boru, baen naro hami tu jolo munu patidahon godang ni roha. Baen di ari nalewati antong. Loja hamu palagut-lagut anak ni hayu sian tor na sada tu torr na sada. Giot pajon-jong asar-asar. Onpe baen madung sidung indon, jadi bagas ni tondi dohot badan ma on dihamu na sapangadongan. Indon hami oban sipanganon, manjamu sangape mangupa-upa tondi dohot badan munu mada hami. Songoni indon, gonti ni salin-salin munu na maisusalio i, sang ape na manjadi abit sumbayang dihamu. Songon i, indon sinamot saotik panambai panobusi ni paku. Tarsai mada bere bope boru hatangku, baen dison dope kahanggi dipatama hobarki, botima.
- Hata ni kahanggi (naro)
Assalamu ‘alaikum Wr, Wb
Hormat dohot tabi, tu adopana ni raja dohot namora, tarlobi di ompui sian bagas godang. Namanamabai hata ni angkang patidahon godang ni roha. Maradopkon babere dohot boru, songon i dohot pahompu, sudena hamu nangkan mangingani bagas boruon.
Haporas ni sorimadingin
Obanon tu Hutaimbaru
Horas tondi madingin
Dihamu mangingani bagas naimbaru
Manuat tu Labuan rasoki
Manangkok tu Sisoma Julu
Saima martamba mura ma rasoki
Dung masuk tu bagas naimbaru
Sai mada bere hatana.
- Hata ni anak boru (naro)
Assalamu ‘alaikum Wr, Wb
Parjolo au marsantabi tu anak ni raja doot namora, tarlobi di ompui najuguk dijuluan, namanjadi uluan ni parsidangan. Sauduran do hata mangihutkon hata ni mora nadung parjolo mandongkon hata sigodang ni roha tu hamu na marbongkot bagas naimbaru. Sadanna on, madung loja hamu palagut batu, palagut pasir, songon i palagut anak ni hayu. On pe madung sidung jadi bagas naimbaru, inganan ni tondi dohot badan dihamu na sapanggadongan:
Sai silalat diginjang sumur
Obanon tu labuhan rasoki
Ingkayu dinga ari
Salamat panjang umur
Mura dohot rasoki
Sian on tuginjang ni ari
Marbunga ma sarindan
Songgopan ni accicopit
Sapangido ma hita tu Tuhan
Pangidoan taon, dapot dijagit
Dibolus hutaimbaru
Simpang dalam tu Huraba
Madung sidung bagas baru
Sagiro muse hamu tu moka
Saima hata pangidoan dihamu namasuk bagas baru, botima.
- Hata ni mora (naro)
Assalamu ‘alaikum Wr, Wb
Puji syukur tu Allah SWT salawat salam tu Rasulullah SAW. Songon I hata hormat santabi sampulu tu anak ni raja dohot namora. Tarlobi diompui sian bagas godang. Songon na manuai hata ni anak borungku. Hami peda laing na sado’a sapangido do, anggiat hami na mangingani bagas naimbaru, marhahorasan sudena. Jala ditamba Tuhan dihamu rasoki naborkat. Jala bagas on, laing bagas simangimpal simangimbalo on nian dihamu na sapanggadongan. Domu tahi dohot pokat munu dison, na mardalihan natolu.
Aut ni sopo saba
Unok ni podom-podom
Masaut na diroha
Suminok mata modom
Silalat ni sabu julu
Disalong boru pareme
Salamat sapanjang ngolu
Sonang muse dohot ate-ate
Saima sahat nihata napatidahon jop niroha. Bane dison dope rajanta halahi doma patamana.
- Hata ni hatobangon (naro)
Assalamu ‘alaikum Wr, Wb
Hormat dohot tabi tu tua sahala ni anak niraja dohot namora. Sumurung lobi tu amanta raja, ompui sian bagas godang. Natutu madai songon pandongkon ni nadung parjolo mandongkon hata, taradopkon hamu na masuk bagas naimbaru.
Muda tali dipatali-tali
Tali naharkar dipayuan
Muda dipasari-sari
Patut mada masyukur tu Tuhan
Harana muda saro sonnari namaoldo napanjong-jong bagas on. Hape hamu poso dope madung tarpajong-jong hamu bagas baru. patut mada ta syukurkon tu Tuhan. Tontu on sude baen denggan ni rasoki munu do on, antong tasyukurkon tu Tuhan.
Magas on manurut adat, bagas ni tondi dohot badan. Di ari nasadarion. Ro mora munu mangkoras-korasi tondi dohot badan munu, anso haros tondi dohot badan munu mangingani bagas baru on. Ihut sian i, dioban halahi ulos godang, pangulosi ni tondi dohot badan munu, namangingani bagas naimbaru on. On mada holong ni mora tu anak boruna, napatidahon holong dohot godang ni roha. Di agama pe bagas on, nasangat godang artinya dibagasan hangoluan on. Torang didongkon ia “ Baiti jannati”. Rumahku adalah sorgaku. Antong harana i, nasadalan do hape adat i, dohot agamanta.
Saima hata sian hatobangon, dison dope raja, songon i dohot orang kaya dipatama dipatupa hobarkon, botiman.
- Hata ni Alim Ulama
Assalamu ‘alaikum Wr, Wb
Alhamdulillah robbil ‘alamin wahdahu wassolatu wassalamu ‘ala asyrofil ambiya i, walmursalin, wa’ala alihi washohbihi ajma’in.
Hormat name tu hatobangon, harajaon, songon ompui sian bagas godang. Diari nasadarion hita marlagut dibagas naimbaruon. Ro mora pahoras tondi tu hamu na mangingani bagas baru. on muda manurut saro agama, namanunjukkon rasa syukur mada on. Harana di agama, didongkon 3 (tolu) do, namambaen “Rumah Tangga Bahagia”; 1) Istri yang sholihah, 2) Rumah yang besar, 3) Kenderaan yang kencang.
Sadarion natasyukurkon “rumah yang besar” Bagas na baru sidung cukup godang. Jadi tarmasuk ma on, kebahagiaan rumah tangga. Tapi di agama didongkon: “jangan buat rumahmu seperti kuburan”. Banyaklah sholat sunat dan membaca al-Qur’an didalamnya. On ulang hita lupa. Jadi torang sanoli do, ajaran adat I, bahat nasadalan dohot agama antong marema rap tasyukurikon tu Tuhan. Saima hata sian alim ulama.
- Hata ni Pamarentahan (kepala desa); mangihutkon
- Hata ni Orangkaya
Assalamu ‘alaikum Wr, Wb
Puji syukur tu Allah SWT. Salawat beriring salam tu Rasulullah SAW dohot hata santabi sampulu tu anak ni raja dohot namora. Di ari nadenggan basa on, ima ari si jop niroha. Tarutamo dihamu nampuna bagas naimbaru. Dison ro mora munu, pahoras tondi, anso horas tondi dohot badan munu mangingani bagas naimbaru on. Ihut dohot maroban Ulos Batak, ima ulos ni tondi dohot badan munu nasapanggadongan.
Ulos batak sijuga-jage
Nadi tonun ni boru regar
Diluat ni banua nasoli
Totop hamu dibagasan dame
Tondi munu pe matogar
Sian on tu ginjang di ari
Naga-naga tus-tus
Naga-naga ni tamboman
Baga-baga ni mora madung dipatulus
Angke madung dapot nadiangan-angan
Silalat ditoru pisang
Pangaroncana ihan sale
Totop hamu dibagasan sonang
Ima sonang ni ate-ate
Saima hata sian orang kaya, tapasahat tu ompui, baen ibana do: namolo patama patupa natarsinta dibagasan roha. Tu ibanama tapasahat, botima.
- Hata ni Raja Pamusuk/ Ompui
Assalamu ‘alaikum Wr, Wb
Bahat hata mauli ate, tu suhut sihabolonan na mar dalihan natolu. Songoni rasa syukur ta ucapkon tu Allah SWT, jala salawat salam tu Rasulullah SAW. Dison hita marlagut, patidahon rasa syukur, tu Tuhan ta na denggan basai, napemurah dohot panyanyang, namangalehen rasoki dihita. Rasa syukur natarutamo, ima tu hamu namangingani bagas naimbaru. Bagas on, sai bagas na margom-gom tondi dohot badan munu nasapanggodangan. Tarlobi dung ro mora munu mangingani bagas naimbaru on.
Gas-gas ditopi ni robaen
Napade panyuanan silalat
Bagas ni tondi dohot badan
Lalu inganan mar amal ibadat
Dison tarpayak dijolo munu; upa-upa tondi, upa-upa badan;
Piramanuk nadihobolan
Anso hobol tondi dohot badan
Sira na ancim pandaian
Anso mura pancarian
Indahan ribu-ribu
Anso hombang ratus hombang ribu
Silalat nadipudunan
Dohot ihan napitu sunge
Dalan pangidoan tu Tuhan
Totop hamu dibagasan dame.
Antong saima sahat ni hata : Horas…Horas….Hoooraaaassssss.
